Шөнийн тэнгэр дэх хамгийн сэтгэл татам үзэгдлүүдийн нэг болох солирын бороог эртний соёл иргэншлүүдэд бурхад эсвэл селестиал биетүүдийн захиас гэж үздэг байжээ.
Хүн гэдэг өөрөө орчлонгийн нэг хэсэг болохоор түүнтэй харилцан шүтэлцээтэй оршсоор ирсэн түүхтэй. Энэ ч утгаараа одонд хүслээ шивнэвэл мөрөөдөл биелдэг гэдэг.
Тэгвэл хүслээ шивнэхэд нэн тохиромжтой үе эдгээр өдрүүдэд (VII.12 ~ VIII.23) тохиож байна.
Delta Aquariids солирын бороо гэж юу вэ?
Энэ солирын борооны гарал үүсэл тодорхойгүй. Гэхдээ 96P/Machholz солироос гаралтай гэж үздэг ба цацраг нь хумхын орд дахь гурав дахь тод Delta Aquarii одны ойролцоо харагддаг учраас ингэж нэрлэжээ.
Delta Aquariids нь маш хүчтэй солирын бороонд тооцогддог бөгөөд цагт 15 ~ 20 солир (25 ч хүрдэг) үзэгддэг нь секундэд 40 км хурдтай байдаг байна.
Delta Aquariids солирын бороог хэзээ харж болох вэ?
Энэхүү солирын бороо нь жил бүрийн долоодугаар сарын дунд үеэс наймдугаар сарын дунд үе хүртэл үзэгддэг ба 2024 оных нь долоодугаар сарын 12~ноос наймдугаар сарын 23~ны хооронд тохионо. Оргил үе нь долоодугаар сарын 29, 30~ны өдөр байна.
Солирын бороог зурхайд юу гэж үздэг вэ?
Шөнийн тэнгэр дэх огторгуйн энэхүү гайхалтай үзэгдлийг зурхайн ухаанд азын бэлгэдэл гэж үздэг. Энэ үе хүсэл зорилгоо тодорхойлж, төлөвлөх нэн таатай мөчүүдийн нэгт тооцогддог бөгөөд гэрэлт оршихуй нь хүн төрөлхтний бодол, хүсэл, итгэл, сэтгэлийн хүчийг нэмэгдүүлдэг гэдэг.
АНУ~ын зурхайч, зохиолч Rachel Lang~ийн тэмдэглэснээр энэ бол та биднийг илүү зорилготой амьдрахад туслах урам зориг, шинэ санааны цаг. Од харвахад хүслээ шивнэдэг шигээ солирын бороо харвал хүслээ шивнэдэг ёстой.
Ингээд та нартаа долоодугаар сарын 12~ноос наймдугаар сарын 23~ны хооронд тохиож байгаа Delta Aquariids солирын борооны энерги ордуудад хэрхэн нөлөөлөхийг, түүний энергийг хэрхэн ашиглах талаар дурдсан товч зурхайг хүргэж байна.
Хонины орд
Энэ үе өөртөө итгэх итгэлийг нь нэмж, амжилтад хүрэхээр тэмүүлэх эрч хүчийг нь мэдрүүлэх цаг байна. Хүлээлтээсээ өндөрт нисэх боломжийг олгох болохоор төдий чинээ өөрийгөө дайчлаарай. Бясалгалаар ч хичээллэж, өөртөө болон хайртай хүмүүстээ цагаа зориулж, эх дэлхийгээсээ эрчим, урам зоригоо нөхье.
Үхрийн орд
Өөрөө хүмүүст хүчтэй сэтгэгдэл төрүүлдэг ч нэг их яриад байдаггүй. Гэхдээ одоо өөрийгөө нээж, санаа бодлоо илэрхийлэх цаг. Дараа гэж өөрийгөө хойш татахын оронд сэтгэл дэх давтагдашгүй ертөнцийнхөө нэгээхэн хэсгийг өөрөөсөө үлгэрлэдэг хүмүүстэйгээ хуваалцаарай. Анхаарлын төвд орох тохироо нь бүрдсэн үе байна.
Ихрийн орд
Delta Aquariids солирын борооны энэ үе аливааг эргэн тунгаах, эргэцүүлэн бодох цаг болно. Бүтээхийг хүссэн зорилгоо дотооддоо эрэлхийлдэг учраас зүрх сэтгэлээ мэдрээрэй. Хүмүүнлэгийн үйлсэд нэгдэх нь амьдралын үнэ цэнийг сэхээрч, хүн хүндээ утга учиртай амьдрахад нь туслах боломж болно.
Мэлхийн орд
Тухтай бүсээсээ гарах цаг иржээ. Энэ үе өөрчлөлт, шинэчлэлийг бэлгэдэж байна. Тэгэхээр чиглэн ирж яваа эерэг энергийг талархан хүлээн авч, түүнийгээ идэвхтэй ашиглаарай. Шинэ идеологи, сонирхолтой болж, карьер, нөхөрлөлийн харилцаагаа тэлэх боломжит үе тохиож байна.
Арслангийн орд
Шаргуу хөдөлмөрийнхөө үр шимийг хүртэх өдрүүд ирсэн байна. Карьертаа зориулсан сэтгэл, зүтгэлээрээ үнэлэгдэх ч магтаалд мэдрэмжтэй хандаарай. Олны анхаарлын төвд орших дуртай ч хүмүүсийн хэлэх үг биш, бүтээсэн ололтдоо үнэ цэн өгөхийг хичээгээрэй. Сайшаагдах дуртай шигээ бүтээгч нэгэн байх цаг.
Охины орд
Нэг алхам ухарч, аливааг том дүр зургаар харахыг хичээгээрэй. Энэ үе өнгөрснөө даван туулж, өөрийнхөө хамгийн шилдэг хувилбарыг бүтээх боломж болно. Дотно нэгэн эсвэл хамт ажиллаж байсан хүн хамтрах санал тавьж магадгүй. Карьерын боломжид сониуч сэтгэлгээгээр хандвал төдий чинээ өсөж хөгжинө.
Жинлүүрийн орд
Төрөлхийн тэнцвэрийг эрэлхийлдэг шигээ эдгээр өдрүүдэд ч гэсэн тэнцвэрээ хадгалах гэж хичээх төлөвтэй. Шинэ эхлэлд таатай ч нөхөрлөл, карьерын харилцаан дахь шийдэгдээгүй асуудлуудаа нэг тийш болгоорой. Өөрөө хүмүүст сэтгэл татам гэх сэтгэгдэл төрүүлдэг ч мэдлэг, чадвараа үнэлүүлэх хэрэгтэй.
Хилэнцийн орд
Энэ үеэр шинийг эхлүүлэх хүсэл хүчтэй илэрнэ. Гэвч одоогийнхыгоо дуусгаагүй цагт энэ эхлэл төдийлөн амжилт авчрахгүй. Амьдралд өөрчлөлт хэрэгтэй ч бүхнээс хоцрох вий гэсэн айдастаа хүлэгдэж, өөрийгөө хүчлэх шаардлагагүйг санаарай. Тэгэхээр эдгээр өдрүүдийг сэтгэлтэй хүнтэйгээ харилцаагаа бэхжүүлэх боломж хэмээн харах нь илүү тохиромжтой.
Нумын орд
Өөрөө нийтэч, илэн далангүй нэгэн ч сүүлийн үед өөрийгөө нэг л нээхгүй байна. Нэг шалтгаан нь өнгөрснөө явуулахгүй байгааг илэрхийлнэ. Өөрийгөө шинэ хүмүүст нээ, сэтгэл хөдөлгөм туршлага бүтээ, тэгвэл нэг газартаа гацсан мэт санагдахгүй болно. Хэт хэтийг харах хэрэггүй, одоо цагаа мэдэрч амьдаръя.
Матрын орд
Бүтээлч хандлага оргилдоо хүрэх энэ үеийг ашиглан эерэг дадал зуршлаа хөгжүүлж эхлээрэй. Дараа гэхийн оронд энд, одоо цагтаа төвлөрөх хэрэгтэй. Хэн нэгэнтэй дотносохыг хүсэж байгаагаа ч мэдэрнэ. Ямар ч харилцаа байсан алхам алхмаар хичээхийн цагт түүндээ хүрэх болно. Инээх үе байхад гунигт автах үе ч ирнэ.
Хумхын орд
Сэтгэл дэх хүслээ чөлөөтэй илэрхийлж, хайранд өөрийгөө нээгээрэй. Үүрэг хариуцлагаа ч ухамсарлаж аль алиныг нь тэнцвэртэй авч явах үе иржээ. Хэрвээ тэгвэл амьдралынхаа аль ч секторт төсөөлснөөсөө өндөр амжилт гаргах болно. Нөхдөдөө ч цагаа зориулж, найдвараа бусадтай хуваалцах цаг байна.
Загасны орд
Энэ нь амьдралаа илүү дээр болгохын төлөө нэг алхам урагшлахдаа өөртөө 100% итгэлтэй хандах үе байна. Бүтээж байгаа аялалдаа хэр сэтгэл ханамжтай байна вэ? Хэрвээ хурдхан шиг үр дүнгээ харахаар яарч байвал хурдхан шиг зорилго тавьж, түүнийхээ төлөө хөдөлмөрлөж эхлээрэй. Энэ үе чиний цаг.
Delta Aquariids солирын бороо орж байгаа энэ үе бидний амьдралд аз авчрах болно. Хэрвээ илүү амжилтад хүрье гэвэл солирын бороог зурах юм уу, гэрэл зургийг нь дараарай.
Эцэст нь 2024 оны хоёрдугаар хагаст үзэгдэх солирын борооны хуанлийг хүргэж байна.
