Барагцаалж үл мэдэх хязгааргүй сансарт астрологийн маш олон шилжилтүүд хийгдэж байдаг. Тэдгээр нь дэлхий дээрх амьдралд харилцан адилгүй нөлөөлөн оршдог ч ихэвчлэн хүн төрөлхтнийг хувьсан өөрчлөгдөх алхамд хөтөлдөг билээ.
Тэгвэл энэ сард анхааралгүй өнгөрүүлж боломгүй хэд хэдэн чухал шилжилт хөдөлгөөн хийгдэж байгаа ба тэрхүү онцлох эвентүүд нь та бидний амьдралд юу юу авчрахыг хамтдаа сонирхоцгооё.
VIII.04: Арслангийн ордод шинэ сар гарна
- Улаанбаатарын цагаар VIII.04~ний 19:12 цагт
Шинэ сар (өөрөөр хоосон сар) гарах энэ үе хүслээ саранд шивнэх болон шинэ төлөвлөгөө гаргахад нэн тохиромжтой цаг байдаг. Шинэ сарны энерги идэвхгүйгээс идэвхтэй төлөвөөр амьдарч эхлэх мөчлөгийг илэрхийлдэг.
Харин арслангийн ордод гарах энэ үе хийсэн бүтээснээрээ нийгэмдээ танигдах хүсэл төрүүлдэг. Энэ мөчлөг шинэ эхлэл, шинэ сонирхол, хөгжил цэнгэлд тааламжтай төдийгүй романтик сэтгэлгээ хүчирхэгжих болохоор ганц бие хүмүүс өөрийгөө нээж сорих, хостой хүмүүс аяллаа төлөвлөхөд тохиромжтой.
VIII.04 ~ VIII.29: Сугар гараг охины ордод орно
- Улаанбаатарын цагаар VIII.05~ны 10:23 цагт
Сугар гараг охины ордод шилжилт хийх энэ үе сэтгэлийн харилцаандаа анхаарах цаг байдаг. Эмэгтэйчүүд эдгээр өдрүүдэд илүү өөнтөгч, шүүмжлэнгүй хандлагатай болж хэнтэй болзох вэ?, хэнтэй нь үерхэх вэ? гэдэгтээ маш нухацтай хандана. Тэгэхээр аливааг илүү бодитоор харах ч ердийнхөөсөө илүү ичимхий болох хүмүүс ч байна.
VIII.05 ~ VIII.14: Буд гараг охины ордод ухралт хийнэ
- Улаанбаатарын цагаар VIII.05~ны 12:56 цаг – VIII.16~ны 08:16 цаг
Охины ордод хийгдэх Буд гаргийн ухралт хүн төрөлхтнийг өнгөрсөн ба одоо цагт ямар амьдралыг бүтээж амьдарч байгаадаа дүгнэлт хийхийг сануулдаг. Тоомсорлоогүй өнгөрөөсөн олон ч асуудал сөхөгдөх төдийгүй ухаалаг хөдөлмөрлөж байна уу? гэдгээ ч эргэцүүлэх цагийг илэрхийлнэ.
Стресс, ядаргаа мэдрэх нь олшрох ч сөрөг хандлагаа багасгангаа эерэгээр амьдарч эхлэхийн төлөө тэмцэх хэрэгтэй. Тэгэхээр стрессээ хэрхэн тайлах вэ? гэдэгт суралцаарай. Төгс төгөлдөрийг хэт эрэлхийлэх шаардлагагүй. Сэтгэлээ шингээсэн бүхэн төгөлдөр болдгийг санаарай.
VIII.09 ~ XI.03: Juno астероид жинлүүрийн ордод орно
1804 онд германы одон орон судлаач Karl Harding (1765.09.29~нд төрсөн ♎)~ийн нээн илрүүлсэн энэхүү астероидыг эртний ромын домогт гардаг Juno дарь эхийн нэрээр нэрлэжээ. Энэ ч утгаараа гэрлэлт, үүрэг хариуцлагын бэлгэдэл болдог ба эдгээр саруудад гэр бүлдээ илүүтэй анхаараарай.
Хэн нэг нь харилцаандаа үнэнч хандахгүй байвал цаашдаа бүхнийг нууж чадахгүй болно. Олон жил үерхсэн (амьдарч байгаа) хүмүүс харилцаагаа шинэ түвшинд хүргэнэ. Энэ хугацаанд хүлээж авах гэрлэх (үерхэх) санал нь ерөөгдсөн амьдралаар амьдрахын бэлгэдэл болно.
VIII.14 ~ VIII.28: Буд гараг арслангийн ордод ухралт хийнэ
Энэ үе ирэх хэдэн долоо хоногт хүссэн хэмнэлдээ орно гэдгийг илэрхийлнэ. Амьдралаа тэнцвэртэй авч явах амархан санагдаж эхэлнэ. Сэтгэлээ мэдэрсэн цагт бодол дахь төсөөллөө 100% бодитоор бүтээж чадах үе ирсэн байна.
Удаан мартагдсан хүсэл мөрөөдлөө ч санаж, хэрэгжүүлэхээр зорино. Гэвч өөртөө төдийлөн итгэхгүй, сэтгэл нэг л хоосорсон мэт санагдаж ч болно. Урам зориг төсөөлөөгүй үед ирэх боловч төрөх санаа нь үнэ цэнийг авчирна. Энэ үеэр экстэйгээ уулзаж ч магадгүй.
VIII.19: Хумхын ордод тэргэл сар гарна
- Улаанбаатарын цагаар VIII.20~ны 02:25 цагт
Энэ үеэр шивнэх ямар ч хүсэл, зорилго 100% биелдэг гэдэг. Хүсэлдээ хүрэх алхмаа хүн нь өөрөө бүтээх учиртай ч тэнгэр эрхсийн ивээлээр бүтэмж хийгээд бүтээмж өндөр байна. Тэргэл сарантай шөнө талархлын тэмдэглэл хөтөлж эерэг эрчмийг энэ амьдралдаа дуудаарай.
Тэгвэл хумхын ордод гийсэн тэргэл сарантай өдөр хүн төрөлхтөн илүү биеэ даасан байхыг хүсдэг. Өөрийгөө хойш татаж байгаа бүхнээс чөлөөлөгдөж, өөрчлөлт, шинэчлэлт рүү тэмүүлж эхэлнэ. Бүтээсэн өөрчлөлтийнхөө үр нөлөөг ч тодхон харж, урамших сэтгэлээр оргилох болно.
VIII.22 ~ IX.22: Нар охины ордод орно
- Улаанбаатарын цагаар VIII.22~ны 22:55 цагт
Ингэснээр астрологийн ертөнцөд нэгэн шинэ улирал эхэлж байна. Энэ үеэр амьдралаа хэрхэн бүтээх вэ? гэдэг арга ухаанд илүүтэй суралцах болно. Детальд анхаарснаараа хүчин чармайлтаа тарамдахгүй байх боломж бүрдэнэ. Охины ордын улиралд эхлүүлснээ дуусгах тэвчээр, бүхэнд зохион байгуулалттай, бодитоор хандах чадвараа хөгжүүлнэ.
VIII.24 ~ X.27: Vesta астероид охины ордод орно
Астероидын бүслүүрийн хоёр дахь том хэмжээтэй (диаметр нь 525 км) астероидоор нэрлэгддэг Vesta~г германы одон орон судлаач Heinrich Wilhelm Matthias Olbers (1758.10.11~нд төрсөн ♎) 1807 онд нээсэн ба гал голомтыг бэлгэддэг ромын дарь эх Vesta~гийн нэрийг хайрлажээ.
Энэ нь хүн төрөлхтний сүнслэг оршихуйн бэлгэдэл болдог. Энэ ч утгаараа та энэ дэлхий дээр ямар үүрэгтэй төрсөн бэ? гэдгээ илүүтэй ухаарах үе байдаг. Хэрвээ дүр эсгэж амьдардаг бол энэ үеэр сүнснийхээ сонгосон амьдралаар амьдарч эхлэх хэрэгтэй.
Тэрээр, мухар сүсэгт итгэж хэтэрхий муйхарлалгүй зүрх сэтгэлээ мэдэрч, яагаад үүнийг хийж амьдрах ёстой вэ? гэдэг мөн чанар, үнэ цэнээ тодорхойлохыг сануулж байна.
VIII.26 ~ XII.07: Ceres одой гараг матрын ордод орно
Италийн математикч, одон орон судлаач Giuseppe Piazzi (1746.07.16~нд төрсөн ♋)~ийн 1801 онд нээн илрүүлсэн одой гараг Ceres матрын ордод шилжилт хөдөлгөөн хийнэ гэдэг нь карьертаа илүүтэй анхаарах цаг ирснийг илэрхийлдэг.
Энэ үеэр ямар ч боломж тохиосон үүрэг хариуцлагадаа үнэнч, тууштай хандаж, шаргуу хөдөлмөрлөх хэрэгтэйг сануулна. Ялангуяа карьераа шинээр эхлүүлж байвал хаана, ямар ажилд орох вэ? гэдэгтээ бодолтой хандах хэрэгтэй.
VIII.29 ~ IX.22: Сугар гараг жинлүүрийн ордод орно
- Улаанбаатарын цагаар VIII.29~ний 21:23 цагт
Сугар гараг эрхшээдэг орддоо байрших энэ үе хүн төрөлхтний амьдралд дурлал хайр цэцэглэж, аз завшаантай боломжууд тохиож, өсөж хөгжихөөр тэмүүлэх тааламжтай цаг байдаг. Талархах дадал төлөвшүүлэх нь эдгээр өдрүүдийг илүү бүтээмжтэй өнгөрөөх эхлэл болно.
Ямарваад илүү таашаалтай хандаж, ихэнх цагаа бусадтай өнгөрөөх хүсэл төрнө. Өгөх авахын тэнцвэрийг хадгалж, өдөр тутмын амьдралаа идэвхийлэн бүтээхээр төлөвлөөрэй.